Чурапчыга доруобуйаларынан хааччахтаах уопсастыба декадатын түмүктүүр тэрээһин буолла
Ол курдук, Чурапчы нэһилиэгэр оройуоннааҕы “Айылгы” НАДь-гэр күн бастакы аҥарыгар улуус туһааннаах тэлтэлэрин кытта көрсүһүү ыытылынна.
Манна Социальнай харалта, Пенсионнай пуонда, “Работа России” вакансия базатын, Социальнай пуонда, “Мой Бизнес” киин исписэлиистэрэ кэлэн, дьоҥҥо сүбэ-ама биэрдилэр, мунаарар ыйытыыларыгар хоруйдаатылар, ыччат отделын исписэлииһэ түмсүүлэр тустарынан сырдатта.
Бу тэрээһиҥҥэ улуус тоҕус нэһилиэгиттэн кэлэн кытыннылар: Кытаанах, Сылан,Чыаппара, Мырыла, Мындаҕаайы, Хатылы, Болтоҥо, Төлөй, Чурапчы.
Декаданы түмүктүүр тэрээһин Хатылыттан Гаврил Павлов эҕэрдэ ырыатынан саҕаланна. Чурапчы улууһун инбэлииттэр уопсастыбаларын бэрэссэдээтэлэ Саргылана Хоютанова 2024 сыл устата ыытыллыбыт үлэни-хамнаһы, араас таһымнаах куонкурустарга, күрэхтэһиилэргэ ситиһиилэри сиһилии сырдатта. Уопсастыба тэрийэр үлэтигэр, тэрээһиннэригэр көхтөөхтүк кыттар, мэлдьи көмө, өйөбүл буолар дьоҥҥо өрөспүүбүлүкэ уонна улуус туһааннаах уопсастыбатыттан Махтал суруктар туттарылыннылар.
Улуус дьаһалтатын сүрүн исписэлииһэ Алена Андреевна Пермякова эҕэрдэлээн туран, «Үтүө суобастаах үлэтин иһин» бэлиэни Николай Антонович Макаровка (Чурапчы), улуус баһылыгын махтал суругун Афанасий Афанасьевич Артемьевка туттарда. Улуустааҕы адаптивнай спорт 100 сыллаах бэлиэтинэн Николай Никифорович Баишев (Чыаппара) наҕараадаланна.
Сыл түмүгүнэн өрөспүүбүлүкэтээҕи куонкурустарга ситиһиилээхтик кыттыбыт дьону чиэстээһин буолла: «Дочки-Матери» кыттыбыт Влада уонна Инна Никитична Макаровалар, «Дьоллоохпут бииргэ»дьиэ кэргэн куонкуруһун кыттыылаахтара Болтоҥоттон Полина Петровна, Апон Иннокентьевич Андросовтар, «Дебют года» өрөспүүбүлүкэтээҕи анал аат Төлөйтөн Дарина Хоютанова, бу күһүн буолбут «Инвастартап ВОИ:Дальний Восток» бастакы слет кыттыылаахтара.
Ону таһынан анал ааттар олохтонон туттарылыннылар:
«Бастыҥ уопсастыбанньык»- Дария Прокопьевна Иванова (Чурапчы);
«Бастыҥ спортсмен» — Иван Иванович Хоютанов (Мырыла);
«Көлүөнэ билиниитэ»- Алексей Николаевич Терютин (Кытаанах);
«Сыл партнера»- «Афанасий» маҕаһыын (Чурапчыттан ИП Афанасий Михайлович Данилов);
«Айымньы эйгэтигэр үрдүк ситиһиилэрин иһин» Андриан Русланович Соловьев (Мырыла);
«Бастыҥ дьиэ кэргэн» — Екатерина Ивановна, Николай Егорович Саргыдаевтар (Дириҥ);
«Бастыҥ түмсүү» — Кытаанахтан,»Сыккыс» түмсүү (сал. Парасковья Владимировна Новгородова).
Оттон Алаҕар нэһилиэгин түмсүүтүн өр сылларга салайан кэлбит Дмитрий Николаевич Сорокоумов бэтэрээннэри балыгынан күндүлээн, үөрүүлэрин өссө үрдэттэ.
Бука барыгытыгар кытаанах доруобуйаны баҕарабыт, олоххо, сырдыкка тардыһыыгыт хаһан да уҕараабатын. Инникитин да араас ыытыллар тэрээһиннэргэ мэлдьи көхтөөх буолуҥ!
Саргылана Хоютанова, Чурапчы улууһун ВОИ бэрэссэдээтэлэ
Comments